Тодруулбал... Ус, ундаа, цай, тос, витамин гээд хүнсний, эрүүл мэндийн бүтээгдэхүүн үйлдвэрлэдэг тус компани 2020 онд шингэн хүнсний үйлдвэрээ ашиглалтад оруулсан билээ. Анх нээлттэй ХК болохдоо тус үйлдвэрийн санхүүжилтийг татан төвлөрүүлж байсан бөгөөд үйлдвэр ашиглалтад орсноор цэвэр усны үйлдвэрлэл 24 дахин нэмэгджээ. АНУ-ын FDA-д компаниа бүртгүүлж Amazon.com дээр чацарганын тос зарж эхлэн зах зээлээ өргөжүүлжээ. Судлаад үзвэл… Борлуулалтын орлого 32%-аар нэмэгдэж, цэвэр ашиг 33%-аар нэмэгдэн 1 тэрбумд хүрсэн нь цар тахлын нөлөө бага байсан бололтой харагдаж байна. Уг нь анх үнэт цаасны танилцуулгадаа аль 2018 онд ₮1.6 тэрбумын ашигтай ажиллаж, 2020 онд тус дүн ₮3.9 тэрбумд хүрэх төлөвлөгөө тусгаж байжээ. Ашигтай ажилласан ч эздийн өмч нь ₮2.6 тэрбумаар, нийт хөрөнгө нь ₮1.8 тэрбумаар буурчээ. Эздийн өмчийн “Хөрөнгийн дахин үнэлгээний нэмэгдэл” данс ₮3.5 тэрбумаар буурсан ба задлаад харвал үндсэн хөрөнгө ₮1.7 тэрбум, биет бус хөрөнгө ₮1.8 тэрбумаар үнэлгээ нь буурчээ. Урт хугацаат өр төлбөр ₮3.4 тэрбумаар буурч богино хугацаат зээл ₮4.1 тэрбумаар нэмэгдсэн нь 2021 онд томоохон зээлийн төлөлт хийхийг харуулж байна. Эцэст нь… МХБ дээрх Монос группийн төлөөлөл болсон тэдний хувьд ашиг, орлогын өсөлт давгүй байгаа ч анх IPO хийхдээ танилцуулсан төлөвлөгөөг нь харвал биелэлт хангалтгүй байна.